ألقيتها بمناسبة مرور اربعين سنة على تأسيس فرقة ارز لبنان الفلكلورية 16/12/2017
أربعين سنه.. ولكْ كيف مرقت قولْ
يا بْنِ العاقوري الـ بالوفا مجبول
سنين تعبت من شقا الهجران
وبعدك قوي.. انشالله العمر بيطول
صرلي زمن عم جمّع الأوزان
تا إمدحك.. والشعر ما بيزول
بتطل متل الحلم ع الوجدان
وبتصادق، وصدقك حَكي معسول
فرقة أرز لبنان وين ما كان
بيرق محبه، بالدهب مشغول
قدّام إسمك في إسم أوطان
همّك، إيمانك، تنتصر ع طول
وحدّك شباب، بنات، مع نسوان
رقصوا الدبكه وطيروا العقول
كل اللي فلّوا من قديم زمان
اجتمعوا الليله بحب مش معقول
زرعوا الفرحه بقلبك الزعلان
عرفوا في غصّه والدموع سيول
بميلاد رب الناس والأكوان
لازم الضحكه ع الشفاف تجول
درّبتهن بالعز والتحنان
تا صار إسمن بالعَلَم مجدول
قامات متل جبال من صوان
ودبكات صوتا بالمجد مغزول
أرزات خضرا جامعا بستان
وقلبك وطن.. صار الوطن مسؤول
لفرقة أرز لبنان.. يا لبنان
حضّر وسام الأرز.. دقّ طبول
إيلي عاقوري مبدع وفنان
لمن ع صدرو بيرقص النيشان
بيصير ع أشرف صدر محمول
