حرامي

ـ1ـ

الشّعب انْتَخْبو.. وقلّلو: كُونْ

مْمثلنا بْمَجْلس هَـ الشّعبْ

تاري هَـ النايِبْ  مَلْعونْ

مْعَوَّد عَ السّرقه وْعَ الكذبْ

ـ2ـ

وْبَلّشْ يِسْرُق كيفْ ما كانْ

وْيِفْتَح عَ حْسابو دكّان

وِحْقُوق الشّعب الْمِسْكين

صارتْ كوسى وباتِنْجان

ـ3ـ

وْبَلّشْ يْعَبّي جْيابُو

وِجْيابُو بِتْساع كْتيرْ

وَظّف أهلُو وأصْحابُو

وْبَرْطَلْ تا يْصَفّي وزيرْ

ـ4ـ

وبالوزارَه.. الشّطارَه

ما خلّا فيها بارَه

وْكتْروا أزلامو وْصارُوا

متل الْحارْجي بِرْبارَه

ـ5ـ

فَكَّرْ حالُو بِـ لُبْنانْ

كل شي بالدوله فلتانْ

لكن نحنا بسيدني هونْ

منْحاكِمْ أكبَرْ إِنْسان

ـ6ـ

تْطلّع فيه القاضي وقالْ:

رِسْمالَك أكبر رسمالْ

عَ سيدني جايي مَنْتُوف

كيفْ قدرتْ تْجَمّع مالْ

ـ7ـ

وَطّى راسُو.. والإعْلام

عَمْ بيصَوّر دَمْعاتُو

أوّل لَيْلِه بْحَبْسُو نام

وْمِحْيِت سيدني دَعْساتو

**