عصام


دمعة شربل بعيني على الشاعر عصام ملكي

ـ1ـ

اليوم بدّن يسمعوني الناس    

يا إبن ملكي.. وعدّ ألطافك

وميزان شعرك للوزن مقياس   

ما في حدا بالوزن ما خافك

وع قد ما وجودك حلو وحساس   

صارت النكته ترافق شفافك

وما نسيت بنتك.. شمعة القداس  

متل الحلم عاشت بأطيافك

حبيت إنو تزورها وتنباس   

بأعلى سما.. وتغل بلحافك

بعدو سْريرا بالفكر وسواس   

موت الطفوله كسّر كتافك

ـ2ـ

تارك "يولندا" رفيقة الأشعار   

ليش حتّى قسيت ع حبّك؟

أجمل قصيده تركتها بالدار  

أم البنات حفرتها بقلبك

من بلاد خلف البحر جنحا طار   

بنتك إجت.. عم شوفك ملبّك

قوم لاقيا.. دمعاتها قنطار     

بناتك يا ملكي.. دربهن دربك

يا عصام الشعر.. شو ما صار     

بتضل عايش موطنك كتبك

وبكروم بشمزين في أزهار    

انزرعت إلك.. عم يسقيا ربّك

موتك ألم.. موتك أنين ونار   

منكبر اذا منقول: منحبّك

شفت الدمع نازل بسيدني جرار    

فكّرت إنو الشعب عم يبكيك

تاريك عم تبكي على شعبك

ـ3ـ

أيّا عَرَق رح تنتج الكركه   

وتمرمر العنقود ع غيابك

ما سْكِرْت مرّه.. سِكْرِت الضحكه   

ودوّبت كل الحب بشرابك

وأيّا قصيده قادره تحكي    

وجنّت وقت ما تشلّع كتابك

جوقات زارت بيتك الملكي   

وما تسكّر بوجّ البشر بابك

إسمك عصام.. وعيلتك ملكي   

خالد إنتْ بعقول غيّابك

وعايش ع طول بقلب احبابك


روميو

 


دمعة شربل بعيني على الشاعر روميو عويس


ـ1ـ

مشتاق شوف تشرقط الضحكه

يا روميو.. يا شاعر الحلوين

كل الصبايا تجن تا تحكي

وتلبّسن بالشعر الفساتين

بسيدني "يا بو طوني" تركت بركه

عيال متل الصخر متحدين

وما قلت مملكة الشعر ملكي

وشعرك وصل من هون ع صنين

واليوم جايي تقطع الشركه

بيناتنا.. تا تغيب عنا سنين

ما عاد عندي دموع تا إبكي

عطيني دموعك يا نبع رشعين

ـ2ـ

أيلول، قالوا، بالشتي مبلول

تاري الشتي دمعات عينينا

تا تغيب عنا هيك مش معقول

يا الكل عمرك تشفق علينا

إنت "بو طوني" البالشعر مصقول

قصايد دهب علقت بدينينا

إنت "بو طوني" السوسحت العقول

وإسمك ع وزن الأوف غنينيا

شاعر عطيم بغربتك مسؤول

بنت "الخطيه" بتعرفا "وينا"

و"بكاس" أحل "نبيد" عم بتجول

وتزرع عناقيدك ع إيدينا

لولا "الكورونا" بتعرفك ع أصول

عن هالجريمه غمّضت عينا

لكن ، يا حسره، تركتك مقتول

استشهدت يا "بن عويس" بالهجران

لبنان جن.. وهون جنينا

**

ـ كتب الشاعر 

1ـ وين الخطيه؟

2ـ كاس نبيد

3ـ عناقيد شعر

**


I love you

 

-1-

When I reach my goal

You’ll see me standing tall

And all the stars above

For your eyes my love

I’m sure they will fall

-2-

My days wouldn’t pass

If you’re not with me

I dream to be us

Please let it be

-3-

The sky will be bright

The sun will shin for you

And I will sing at night:

You know, yes, you know 

That I love you 


لما الهوا طيرلك الفستان


قالت: حبيبي ليش تا غضبان

وما في سبب تا اليوم تتخلّق

كل عمرك عاشق وولهان

كرمال بوسه شفافك بتسبق

قلتلّها: من نظرتي زعلان

شردت عيوني صوب المعرّق

لمّا الهوا طيّرلِك الفستان

من دون وعي نخّيت حتّى شوف

انكنّو الهوا بفستانك معلّق

حبقه

ليش القلب مجروح

من ضحكة الحبقه

هالريحتا بتفوح

ومنسرقا سرقه؟

والحبقه فيها روح

من هالبشر أنقى

منطّ فوق سطوح

وعميان بالخلقه

منبني صروح صروح

وبتبتدي الفرقه

أحباب تركوا جروح

وحرقه بضهر حرقه

رح إسأل ومبحوح:

شو بينفع الملقى

وفي ناس رح بتروح

وفي ناس رح تبقى؟

منامات

ما دام بيّي مات
حدّو أنا رح فوت
ورح إدفُن منامات
رسمت ضيَع وبيوت
وأموال ومْقامات
وكذبات لفّا سكوت
ونسيت "بو الهمّات"
مش أقوى من طاغوتْ
الـ بتخلفو الإمّات
رح ينتهي وممقوت
وإنّو العمر كلمات
بس تنكتب بتموت
ويا ما انحنت قامات
وانزويت بتابوت
**

على دلعونا

ـ1ـ
على دلعونا وعلى دلعونا
ما قتلنا حدا.. ليش حبستونا؟
حكمتو هالدنيي بجندي وباروده
ورجّف إجريكن "فَيْروس كورونا"
ـ2ـ
كل دوله عظمى.. ما عادت عظمى
"كورونا" بياكل لحما مع عضما
بنيوا قنابل مدري شو إسما
ونسيوا المستشفى.. حتى يشفونا
ـ3ـ
كذبه قوّتكن.. كذبه مشهوره
كشفها "فَيْروس" غطّى المعموره
قرفنا ضحكتكن جوّات الصوره
حاكم يا ألله.. كل الحكمونا
ـ4ـ
يا ربي.. داوي بعطفك مرضانا
كتروا اللي ماتوا.. إرحم موتانا
ما كانوا قعدوا وحكموا لولانا
نحنا انتخبنا العم يسرقونا
**

زجل بين عصام ملكي، لطيف مخايل وشربل بعيني

عصام ملكي:
يا ميلاد الرعد يا الطف سفير
عرفتك شو انت وحبك بقلبي نما 
بهاالصورة الفيها انا لقيتك امير
وعا يْمينك وعا شْمالك نجوم السما
**
شربل بعيني:
بين النجوم اليوم ضيعنا السفير
صفى قمر بيشع ب أعلى سما
زاغت عيوني وصرت عم افزع كتير
لا تواخذوني صرت خاف من العمى
**
لطيف مخايل:
شرّف سفير بلادنا وزار الحِما
لا تخاف يا شربل بعَيني من العما
بطلّة رعد رعدت على سدني الدني
وبدل المطر شتت نجوم من السما
**
شربل بعيني:
يا لطيف اللطف بكلامك حكي 
وخلّى "الرعد" بدل الشتي يشتي بكي 
هنيال قلبو حد منّو نجمتين 
لكن أنا صارت حياتي مشربكه
**
لطيف مخايل:
عَ قصّة الغيري وكلام الترغلي
هَيدا حكي مردود لا تقولو إلي
بيتَك سمالله يا بعَيني طابقين
مفروض من عطر الصبايا ينتلي
**
شربل بعيني:
ليش دخلك ليش بتزرّك إلي 
وع طول عم بتعيد نفس المسأله 
ختيرت حتى طال نجمه من السما 
وبدل العطر بالآخ بيتي منتلي
**
لطيف مخايل:
كلمة انا ختيرت حاجتها كفى
الشعر وجمال القافيه صَوبك لفا
وجودك متل كانون والدُنيا صقيع
ولو كان ما في نار منحّس بدَفا
**
شربل بعيني:
حبّيت إنّي روح صوب الختيره 
تا شوف بعدو الحب عندي يا ترى 
تاري أنا مغروم بالجنس اللطيف
 وجوّات قلبي ساكنه مليون مرا
**

محاورة زجلية بين شربل بعيني ولطيف مخايل

شربل:
يا حسرتي ع الشعر قدام الدلال
سوزان شمس مكعنشه بدر الكمال
زاغت عيون الناس من انوارها
تا صار شربل واقف بفي الجمال
لطيف:
يا شربل بعَيني تنعّم بالهنا
بسمتك بتزيح عن قلبي الضنى
واقف جنب سوزان حسّادك كتار
ومن اكبرالحسّاد يا شربل انا
شربل:
يا لطيف القلب فضلك ما نسي 
وبيوت شعرك باللطافه مكدسه 
ما زال عمري صار ع بواب الفنا 
تركني مع الحلوين إفتح مدرسه
لطيف:
يا مأسّس مدرسه عيّن حرَسْ
تراقب صبايا حبّن بقلبي انغرس
افضل مَ انطرهن ع باب المدرسه
ويدّق قلبي كل ما يدّق الجرَس
شربل:
قلبك إذا بيدق يا شب الحلو
بمليون أهلا ومرحبا منستقبلو
لكن إذا بشوفك ع باب المدرسه 
من فوق سطح المدرسه بكب الدلو
لطيف:
شفتَكْ عَ سطح المدرسه زلمي كبير
حامل دلو بالايد وبتركض كتير
عرفتَكْ مدير المدرسه ووضعك خطير
خفت ع الطلّاب من سوء المصير
دغري قْفلتْ لبْوابْ من اربع جْنابْ
تا خلّص الطلّاب من شر المدير
شربل:
وصل البوليس وقال مينو هالصبي 
الواقف يلطّش ع بنات مهذبه 
لولا المدير وكم كلمه مأدبه 
كان الصبي ع الحبس رايح كركبه 
بس الحنون كتير متلي يا لطيف
بيوقف ع راس السطح نجمه مدهبه
لطيف:
هَيدا الصبي يا شربل مفتّل شَنَبْ
ياما لعنتر عبس دقلّو الطنَبْ
تركلي الصبايا والبوليس على جنَبْ
وعالسطح ضلّك متل ناطور العنب
ما شفتَك على السطح نجمه مدّهبه
نجمه ولكن متل نجمة بو دَنب
شربل:
أكبر شرف تا كون نجمة بو دنب
ضوي العتم.. المع بليلات الأدب
شرفتني بهالاسم ورفعت النسب
مش متل يللي بيشتهي كروم العنب
دنبك قصير وحابب تطال النجوم
خليك فوق الأرض شرقوطة حطب 
لطيف:
ع القافيه والوزن مُش لازم تزيح
مفروض توضع بين بطْلْ وحق زيح
بنجمه اذا تشّبهت حكيك مش صحيح
نورك بضو الشمس بيصفّي شحيح
يا ريتني حطبه انا او عود شيح
كنتْ منّك ع القليله بستريح
وبيحرقوني مع وراق اليابسه
ودفّي المغاره اللّي وْلِدْ فيها المسيح
شربل:
إسمك لطيف وليش تا صفّى قبيح 
بتقتل بشر قدّام سيّدنا المسيح 
تراك الزجل كرمال ألله واستريح 
عم تنتقد إنسان شبّعتو مديح 
بحبك أنا ولو كنت حطبه وعود شيح 
هيك علمني مسيحي بالصحيح 
رح إرحمك بالشعر لا تزيد الجفا
عن حب شربل ليش دخلك عم تزيح؟
لطيف:
اسمحلي يا شربل اختم باحلى كلام
رح طَمنك باقي صديقك ع الدوام
لكن اذا شي يوم صوّبت السهام
لا تنتظر منّي محبه وانسجام
لذّة حوار الشعر فجوه واِلتآم
ما يكون ناعم متل ريشات النعام
ولولا صَبَحْ بيناتنا بطش وحروب
بَعدْ الحروب ماّكدي دَورْ السلام
شربل:
ع طول بين اللطف والالفه انسجام
وبين الشعر والشعر شو بيحلى الكلام
شو ما قلت رح ضل حبك ع التمام
وتبقى بعيني الشاعر العالي المقام
واحلى حمامة حب بتجيب السلام
لكن إذا تحديت شربل يا لطيف
لا تزعل ان صوبت لعيونك سهام

زجل بين لطيف مخايل وشربل بعيني

لطيف:
لبسِتْ البدله واعلنتْ "بَاتي" الكفاح
ونحنا فرحْنا بعَودة ليالي الملاح
ولمّا بنظرات العيون تصّوبي
منرفع العشره قبل ما تسلّي السلاح
شربل:
واقف أنا حد البهاء ومختفي
ما شافني شاعر بأخلاقو وفي
تاري البهيه بتسرق عيون البشر
وبتلبسك يا صاحبي القبع الخفي
بهية:
مين اللي قال اليوم شربل مختفي
وشعر القداسه من حروفك مكتفي
عيون البشر من نورك بتاخد نصيب
حتى بقبع المجد دوماً تحتفي
لطيف:
الشعّار برعاية بهيه بيشكروا
وعطفها من الصعب نحنا ننكروا
مُشْ بس بنسى شربل بعَيني انا
اسمي نسيتو وما عدت اتذّكرو
شربل:
خرفان صاير.. والخرف ما بتنكرو
واسمي أنا من الصعب انك تذكرو
شربل بعيني يا لطيف بغربتو
متل الجبل.. بتقول يا ما اكبرو
شربل:
قريت شعرك يا بهيه عن حذر
ما رضيت ردد اسم شاعر منذكر
بحبو أنا.. لكن عدوي بالزجل
هيك الزجل بيكون تا يرضي البشر
لطيف:
عَ كلمة الخرفان بصرخ يا لطيف
لطّف يا شربل جوّنا وداري لطيف
اسمك واسمي وكل اسم بينحذف
لمّا تطل نعومة الجنس اللطيف
شربل:
كرمال عينك يا بهيه مع لطيف
رح قول شعر مدهب وشكلو ظريف
من بعد خبرة عمر يا ست البهاء
من الصعب اني زعل الجنس اللطيف
لطيف:
بجيرة بهيه وشربل استحلَيت عيش
عيشه هنيّه لا ضجيج ولا خشيش
زعّل يا شربل صاحبك بيسامحَك
زعّل مرا بتنام برّا ع الحشيش
شربل:
ما بزعلك وحياة عينك بغمرك
بعطف الاخوه وبالمحبه بزنرك
لكن أنا خايف عليك من الهوى
توقع شي وقعه يا لطيف ونخسرك